السلام عليكم , مدبولي يعود من جديد بعد ألحاح جماهيري ومطلب شعبي بعودته مره اخري , عدت من جديد ولكن مفيش معايا اي جديد فالزمالك زي ما هو بيخسر وجماهيره حزينه والاهلي زي ما هو بيكسب وياخد الدوري وجماهيره تهيص , ولكن سئلني احد الاصدقاء الاهلويه السؤال اياه الغلس اللي مالوش اجابه .. انت ليه زملكاوي .؟؟؟؟ ومصر( اي مصمم ) علي كده ؟؟؟
والاجابه هي ..- ان الحكمه بتقولك (( يا بخت من بات مظلوم ولا بات ظالم ..ومن بات مغلوب ولا بات غالب )) ودي دعوه صريحه وواضحه لان تكون زملكاوي
- اذا كان الاهلي هو فريق الشياطين الحمر فالزمالك هو فريق الملائكه البيضاء
- الحمر لون فاقع يثير الاعصاب اما الابيض فهو لون الهدوء والاستجمام
- لو انت اهلاوي فانت عارف ان اللي بيقف جانبك في الميكروباص اهلاوي والقهوجي اهلاوي وبتاع العجل اهلاوي والطبقه الشعبيه كلها اهلاويه اما انك تكون زملكاوي ويقابلك واحد زملكاوي فده بيكون حدث فريد من نوعه وبتكون فرحان اوي وبتتكلم معاه بثقه وبتبدا تضعف قدامه بعد لما كنت عامل فيها الديك امام الاهلويه وتبدأ تشكيله همك وقد ايه انت بتتعذب كل يوم
- عندما يسئلك واحد عن انتمائك الكروي وانت خايف تقوله زملكاوي لتتبهدل وتشيل الهم وفي نفس الوقت مش قادر تنطقها بلسانك انك اهلاوي لانك مش طايق اسم انادي فتبدا تتلفت حوليك وتبدا تعرق من الاحراج وتقوله انا مش مهتم بالكوره
- ان معظم الاهلويه اصبحوا كذلك بالوراثه اما الزملكاويه وهما القله اللي فاهمين كوره وبيقدروا يناقشوا ويعدلوا في افكار المدربين
- ان الاهلي بيكسب دايما وجماهيره بدأت تزهق من البطولات والمكاسب انما لما تكون زملكاوي المكسب ده بيجي من الموسم للموسم كل شهرين تلاته مره فبيكون الفوز ليه فرحته برضه !!
- الزمالك بيعالج مشكله اجتماعيه كبيره فالطبقه او الشريحه من المجتمع المصري التي تعيش حاله ماديه ضعيفه وتعاني من مشاكل الحياه لما بتشوف الزمالك او تشوف الزملكاويه بتفتكر (اللي يشوف بلوه غيره تهون عليه بلوته) ويرضي بما كتبه الله له ويقولك انا هفتري الحمد لله ..اما الناس الفقرا وكمان زملكاويه فدول ربنا يتولاهم بقه
- ان مشاهير مصر زملكاويه احمد زويل , الدكتور زكريا عزمي , محمود محيي الدين , ابراهيم عيسي , عمر طاهر , بلال فضل, محمد منير , عمرو دياب , هاني شاكر , واخيرا... الحاج مدبولي
