skip to main |
skip to sidebar
فى يوم من الايام وبعد فوزه بانتخابات نادى الزمالك- وخصوصا على الجبار مرتضى منصور- طلع ممدوح عباس قصدى اونكل عباس وقال " يا جدعان يا رجالة انا عندى مفاجأة" كل الناس قعدت تتكلم عن مفاجأة عباس يا ترى عبس مخبى لنا ايه طلع لنا دوحة وقال انا جبت ميدو للزمالك , هلل الجدعان والرجالة وقعدت الناس تهتف دوحة دوحة ميدو ميدو ويوم ما جيه ميدو من المطار راح يجى خمس الاف او 6 الاف مشجع يستقبلوا النجم العالمى ميدو ويهللوا ويقولو ميدو ميدو وصا حبنا اتنفخ اوى واقتكر انه جاى هيفتح عكا وهو اللى هيشيل الزمالك من مصايبة- مايعرفش اللى فيها- المهم جيه عمو ميدو بضفايره بعد مالم شعره عند حلاق- قصدى كوافير- فى لندن قبل ما يجى اصل الكوافيرز فى مصى ييييا ,بعد وصولة بيوم نزل النجم ميدو التدريبات وراح مدرجات الزمالك اكتر من 10الاف مشجع _ يااااااه من زمان الواحد مسمعش الرقم ده فى مدرجات الزمالك- المهم نزل ميدو ابو ضفيره الملعب يدلع والناس تقول ميدو ميدو من يومها وهو افتكر انه خلاص كده بقى هو الكبير مش بس فى الزملك ده كمان فى الكورة كلها فى مصرخصوصا انه راجع من الدورى الانجليزى -طبعا بيطلع يقول الناس تحمد ربنا انى رجعت مصر بعد ما كنت بلعب فى اوروبا وف اقوى دورى ف العالم -المهم انا صاحبنا عمل كل حاجه هو عايزها ف الزمالك اخد فانلة النجم الحقيقى حازم امام رقم 14 واخد شارة الكابتن وكأنه صاحب الكورة فعلا ده غير الفلوس اللى هياخدها من الاونكل بتاعه , وجية وقت الجد الزمالك بيلعب مع بتروجيت والنتيجة 1/1 والزمالك مش عارف يعمل اى حاجة مع دفاع بتروجيت قعدت الجماهير تنادى ميدو ميدو وهو كان ساعتها فى البدلاء , نزل ميدو واول مانزل الحكم حسب ضربة جزاء للزمالك اتقدم ليها متخصص الحاجات دى ف الزمالك فتح الله بس طبعا ازاى فتح الله يلعبها وابو ضفيرة موجود ميصحش , اخد الكورة ودخل على منطقة الجزاء ودخل وكل جماهير الزمالك اعتبرت انه دخلها خلاص لدرجة ان واحد من الجماهير فى المدرجات بيتكلم ويقول يالا عايزين التالت فرد عليه واحد وقاله ياعم مش لما دى تدخل فرد عليه وقاله ياعم ده ميدو هيدخلها ياعم بس انت متفقرش ودخل النجم وحط الكورة فين بره التلات خشباااااااااااات , هاجت جماهير الزمالك وقعدت تشتم فى ميدو طلع ميدو وقال يا جماعة اى حد بيضيع عادى طلع ناس عاقلة وقالو فعلا عادى ده مارادونا ضيع يبقى ميدو ميضيعش قالوا خلاص يبقى منحكمش عليه دالوقتى نستنى الماتش الجاى , وجية الماتش الجاى وكان مع المقاولون وكالعادة الزمالك دخل فيه جولين من المقاولين والفرقة مزنوقة وعشان الجماهير طيبة وعشارية قعدت تنادى ميدو ميدو - يادى النيلة- نزل ميدو بعد ماغير قصة شعرة عن الماتش اللى فات وقعد يوجه فى زمايلة كأنه المدرب ويقول لده روح هنا وانت تعالى هناك وهو عشان يوقف كورة مفيش خالص زهقت جماهير الزمالك وفقدت الامل منه ومن الفرقة وقالوا الظاهر ان الاشاعة اللى بيقولوها على الزمالك من زمان طلعت صح ان فى حد عامل للزمالك عمل سفلى مربوط فى ورك نملة يتيمة -وربنا يحفظنا- لكوا ربنا يا جماهير الزمالك
الى اللقاء فى حلقة جديدة
